Gwamna Umar Namadi na Jihar Jigawa ya ce ya kamata Shugaban kasa Bola Ahmed Tinubu ya tsammaci sakayyar alheri daga ‘yan Jigawa a zaben 2027 mai zuwa.
Gwamnan ya bayyana haka ne a lokacin da yake jawabi a wajen kaddamar da rabon katin cire kudi na ATM ga wadanda suka ci gajiyar shirin tallafin kudi na gwamnatin tarayya karo na biyu da aka gudanar a Dutse.
Ya kara da cewa, gwamnatin tarayya ta bullo da tsare-tsare daban-daban na tallafawa mutane, don magance matsalar fatara da yunwa a fadin kasar nan, da suka hada da tallafin kudi na Cash Transfer, shirin N-Power, ciyar da Makarantu, da kuma shirin samar da tallafi na gwamnati (GEEP).
Gwamna Namadi ya bayyana cewa a karkashin kashi na biyu na tallafin kudi, kimanin marasa galihu dubu ashirin da uku ne za su amfana, inda za su samu naira dubu saba’in da biyar kowanne.
