Gwamnan Jihar Katsina ya nemi al’ummar jihar da su kare kansu daga hare-haren ƴanbindiga
Gwamnan Jihar Katsina, Dikko Umar Radda, ya yi kira ga al’ummar jihar da su ɗauki matakan kariya don kare kansu daga hare-haren ƴanbindiga da ke addabar jihar.
Ya bayyana hakan ne a taron dandalin tattaunawa da aka gudanar mai taken: “Tattaunawa da Jama’a: Tsarin Kasafin Kudi na Jama’a na 2025” a yankin Daura.
A cikin wani bidiyo da ya karaɗe kafafen sada zumunta, Radda ya nuna ɓacin ransa tare da kira ga malamai da su wayar da kan jama’a game da muhimmancin kare kai kamar yanda addinin Musulunci ya tanada.
Ya ƙara yin kira ga al’umma da su zama cikin shiri don kare kansu daga hare-haren ƴanbindigar, yana mai cewa, “A duk lokacin da suka kawo hari, idan aka tara mutane masu yawa, za a iya fatattakar su domin su kansu suna tsoron mutuwa fiye da mu.”
