Ana zargin wasu ‘yan bindiga sun kashe jami’in ‘yansanda da ɗan sa kai a jihar Sokoto
Ana zargin wasu ‘yan bindiga sun kashe wani jami’in ‘yansanda, Insifekta Eze, da wani ɗan sa kai a Sokoto a yayin wani kwanton ɓauna da suka kai da sanyin safiyar jiya Litinin.
Lamarin ya faru ne a wani shingen binciken ‘yansanda a mahaɗar Milgoma da ke kan hanyar Sokoto-Bodinga, inda ‘yan bindigar suka kai hari kan jami’an tsaro lokacin da suka kusance su.
Kakakin rundunar ‘yansandan Jihar Sokoto, ASP Ahmed Rufai, ya tabbatar da mutuwar mutanen, yana mai bayyana lamarin a matsayin kwanton ɓauna da aka tsara.
A wani lamari mai nasaba da wannan, a ranar Lahadi, ‘yansanda sun yi arangama da wata ƙungiyar ‘yan bindiga a kan hanyar Sokoto-Isa, wanda hakan ya haifar da mutuwar ɗaya daga cikin ‘yan bindigar.
A yayin arangamar, an kwato bindigar AK-49 daga hannun maharan.
