Shugaban Majalisar Koli ta Harkokin Addinin Musulunci ta (NSCIA) kuma Sarkin Musulmi, Muhammad Sa’ad Abubakar III, ya bukaci al’ummar Musulmin da su sanya ido kan ganin jinjirin watan Zul-Hijja na 1445AH bayan faduwar rana a yau Alhamis 29 ga watan Zul-Qa’dah 1445AH, daidai da ranar Alhamis 6 ga watan Yuni 2024.
Sultan Abubakar III ya bada umarnin ne a wata sanarwa mai dauke da sa hannun mataimakin babban sakataren hukumar, Farfesa Salisu Shehu a jiya Laraba.
Watan Zul-Hijja, wata na 12 kuma na karshe a cikin kalandar Musulunci, yana daya daga cikin watanni hudu masu alfarma a Musulunci da musulmin duniya ke gudanar da aikin hajji da bukukuwan Sallah Eid-El-Kabir.
A cikin wannan wata ne alhazan musulmi daga sassa daban-daban na duniya ke taruwa a birnin Makkah na kasar Saudiyya domin gudanar da aikin hajjin da za a fara a ranar takwas ga wata, da kuma gudanar da bukukuwan Sallah daga ranar 10 zuwa 13 ga watan Zul Hijjah.